Hvernig byrjaði þetta ferðalag okkar með Shamballa?

Hér á eftir fer frásögn sem ég ritaði rétt eftir að við komum heim af okkar fyrsta shamballa námskeiði. 

Ferð á shamballa námskeið í Mt Shasta, Kaliforníu 1998

Er við vöknuðum árla morguns 24.október buldi rigningin á rúðunum.  Það var langt síðan það hafði rignt að ráði í hinni sólríku Kaliforníu.  Framundan var um 5 tíma akstur til fjallahéraðsins Shasta í Norður-Kaliforníu þar sem við ætluðum að nema andleg fræði næstu 9 dagana. Við vorum svo heppin að fá bróður minn sem býr í San Ramon til að aka okkur og fræða okkur lítillega um héruðin sem ekið var um.
Námskeiðið fór fram í litlum fjallabæ að nafni McCloud við suðurrætur hins mikilfenglega eldfjalls Mt Shasta.  Bærinn er í um 3600 feta hæð yfir sjávarmáli.  Þetta er gamall skógarhöggsbær sem byggði áður afkomu sína á flutningi timburs sem sagað var í McCloud , með járnbrautarlestum til þéttbýlli staða,  frá stofnun bæjarins árið 1897 til um 1963 er bærinn, sögunarmyllan og járnbrautin var seld. Í dag byggja íbúar afkomu sína á sérhæfðum skógarhöggsiðnaði og ferðamennsku.

Gistiheimilið Stoney Brook Inn býður upp á ákaflega rólegt og notalegt umhverfi með ráðstefnusal (kiwi) sem rúmar um 30 manns á bekkjum meðfram veggjum. Byggingarlag salarins er 6 strendingur og þakið kemur saman í eitt í toppinn.

Við komum til Stoney Brook Inn klukkan 12:20, rétt mátulega til að svala mesta hungrinu eftir keyrsluna frá San Ramon. Það hafði verið úrhellisrigning alla leiðina og því sást ekki til fjalla.  Bróðir minn snæddi með okkur en ók síðan strax til baka til síns heima. 

Í gistiheimilinu mætti okkur eftirvæntingafullur hópur fólks úr ýmsum stéttum þjóðfélagsins og frá ýmsum löndum.  Þetta var ósköp venjulegt fólk sem hafði þó allt sama brennandi áhugann á andlegum málum og við.  Sumir voru Reikimeistarar, dáleiðendur, kennarar eða heilarar en aðrir eins og við höfðu aðeins unnið í sjálfu sér fram til þessa. Við vorum 27 talsins, meirihlutinn konur en karlarnir töldu 6.
Það voru 7 mánuðir síðan við höfðum heyrt af þessu námskeiði og þá strax  hafði vaknað óstjórnlegur áhugi til að sækja það þó að það væri haldið svo fjarri heimahögum okkar.  Við höfðum aldrei áður sótt andlegt námskeið, allt okkar nám hafði farið fram með lestri bóka eða í gegnum alnetið auk þess sem við áttum góðan vin heima sem hafði lagt til góðan skerf á lærdómsvog okkar.

Nú var hins vegar komið að því að læra meira.  Við vissum ekki hvers skyldi vænta og gerðum okkur því engar hugmyndir um hvað vikan myndi bera í skauti sér.  Það eina sem við vissum var að við myndum öðlast réttindi til að kenna grunn Merkaba hugleiðslu tækni og verða Shamballa Reiki meistarar.  Kennararnir voru John Armitage/Hari Das Melchizedek frá Skotlandi og Gary Smith frá Oregon . 

Dagarnir áttu eftir að verða langir þar sem námsefnið var yfirgripsmikið og margt óvænt gerðist sem breytti áætlunum kennaranna.

Hópurinn náði  fljótt vel saman, það var sem við hefðum alltaf þekkst og oft unnið saman á grundvelli kærleikans áður.  Þetta var ein stór fjölskylda og voru kennararnir ekki undanskyldir. Mikil kátína, kærleikur og samkennd var einkenni vikunnar.
John opnaði námskeiðshaldið með því að blása í didgeridoo sem er hljóðfæri frumbyggja Ástralíu.  Með því hreinsaði hann andrúmsloftið og ýmsar stíflur í orkusviði okkar.  Hljómurinn í pípunni var undarlega seiðandi og magnaður. Lilja átti eftir að verða þeirrar gæfu aðnjótandi síðar í vikunni að spila á fiðluna við undirhljóm didgeridoosins.

Germain var fyrstur Meistaranna til að bjóða okkur velkomin til þessarra samverustunda rétt við heimkynni hans en hann hefur aðsetur í Mt Shasta þar sem “ascension” (uppljómunar) sæti hans er sem allir geta heimsótt að næturlagi ef vill.  Fyrsta hugleiðslan af mörgum var síðan hreinsun á aðskotahlutum og verum úr orkuhjúp okkar og virkjun 36 erfðaþátta DNA í stað þeirra tveggja sem flest okkar höfum starfhæfa í líkama okkar. Síðan tók Gary við og kenndi okkur 7 sem ekki höfðum lært Merkaba tæknina áður grunnatriðin og þvílík upplifun, þvílíkt frelsi til að ferðast innan þessa heims. Við gátum skotist eins og ekkert væri milli himintunglanna en aðalatriðið var hinn mikli kærleikur sem við fundum  að við gátum sent til jarðarinnar, jarðarbúa og alheims alls.

Næstu dagar voru sem draumi líkastir, ótrúlegar sögur samstúdenta okkar af ferðum sínum í Merkaba ljósfari sínu treystu trú okkar á eigin upplifun.  Við ferðuðumst saman í hóp undir styrkri stjórn Hari Dasar til neðanjarðarborgarinnar Telosar sem er staðsett djúpt í jörðu undir Mt Shasta, fórum til Ayers Rock í Ástralíu til fundar við frumbyggja og öldunga Ástralíu, til hins forna samfélags indíana , Anastasíu í Colorado og í helli Merlins í Englandi.  Á síðasta degi fengum við svo að fara til heimkynna Melchizedeks  og skoða okkur þar um auk þess sem við gátum sest í uppljómunarsæti hans. Það var ákaflega misjafnt hvernig við upplifðum þessa staði, sumir skynjuðu aðeins orku staðanna meðan aðrir sáu þá ljóslifandi fyrir sér.

Við tengdumst sjálfsvitund okkar (I am source) eða aleind sem  Æðra sjálf okkar kemur frá og unnum að því að hækka tíðnisviðið.

Í gegnum John komu margir Meistarar og ljósverur með boðskap sinn og kærleika.  Eftirminnilegust fyrir okkur öll var sennilega sú stund er Móðir Jörð, Gaia talaði til okkar og snerti svo hjörtu vor, að er hún hafði kvatt blikuðu tár á hverjum hvarmi og fólk féll í faðma.  Hún flutti okkur þakklæti fyrir kærleiks starf okkar og annarra ljósbera hér á jörðu og kvaðst hafa tekið þá ákvörðun að láta ekki verða af hinum stórbrotnu hamförum sem spádómsmenn höfðu sagt fyrir um síðustu mánuði. Þær hamfarir áttu að verða um alla jörð í lok þessa árs. Á þann hátt gaf hún mannkyni enn eitt tækifærið til að finna kærleikann í brjósti sér og lifa samkvæmt kærleiksboðorði Drottins.

Önnur vera sem hafði mikil áhrif á marga í hópnum var höfrungurinn Howard.  Þessar stórkostlegu skepnur sem hafa haldið kærleikanum og ljósinu fyrir okkur mennina í gegnum myrkar aldir hafa lokið hlutverki sínu hér á jörðu og vilja fá að fara heim.  Heim til plánetu sinnar Síríusar þaðan sem þeir eiga uppruna sinn.  Þeim er enginn akkur í þvi að vera friðlýstir því það tefur fyrir heimför þeirra.  Sama má segja um þjóðflokka eins og frumbyggja Ástralíu sem hafa í gegnum árþúsundir haft hlutverki að gegna í sköpunarverki Drottins og verið gæslumenn orkunets jarðarinnar.  Þeirra hlutverki er senn lokið og tími til kominn að kveðja móður Jörð.

Mikael erkiengill  sem aðstoðaði okkur við að klippa á karmísk bönd vakti upp miklar tilfinningar í brjóstum margra og oft mátti sjá tár blika eða axlir bifast af tilfinningahita vegna hins gríðarlega kærleika sem umlék okkur hvern dag og hverja stund þessa dásamlegu viku við rætur Mt Shasta.

Kveðjustundin var magnþrungin, kærleiksrík faðmlög og loforð um áframhaldandi samstarf og framhaldsnámskeið að ári liðnu.

Framundan er mikil vinna við að jarðtengja alla þessa nýju orku og koma á framfæri til annarra þeirri vitneskju sem fékkst þessa viku. Náminu lýkur aldrei og starfið er rétt að byrja.

Mosfellsbær 09-11-1998

Athugasemdir

[Hörður Þórðarson, 4.2.2011 kl. 21:36]

Frábært. Takk fyrir þetta!