Undirbúningur fyrir Shamballa námskeið

Nú styttist í næsta námskeið hjá okkur og undirbúningur í fullum gangi. Þessi undirbúningur fer fram á mörgum starfsstöðvum bæði sýnilegum og ósýnilegum.

Margir þeirra sem hafa komið til okkar hafa sagt frá draumum og sýnum sem þeir hafa fengið í aðdraganda námskeiðs. Þeir fundu fyrir krafti og kærleika.

Ég hef margoft fengið staðfestingu á því að leið og einstaklingur skráir sig fer af stað mikil vinna á innri sviðum þar sem viðkomandi er undirbúinn fyrir þá breytingu sem framundan er í orkulíkömum hans.

Sjálf fann ég vel fyrir þessu áður en ég fór til Bandaríkjanna 1998.

Í dag mun ég framkvæma svokallaða áruhreinsun sem er í sjálfu sér óháð shamballaMDH en ég hef gert að föstum punkti í undirbúningi fyrir námskeið. Við hjónin lærðum sálnavisku áruhreinsun af Carol Hathor fyrir 10 árum síðan. Hún er framkvæmd úr fjarlægð einskonar fjarheilun. Sumir finna fyrir henni og sjá eða skynja breytingar í orkusviði sínu meðan aðrir finna lítið eða ekkert. Það fer allt eftir hversu næm við erum. Ég kalla áruhreinsun iðulega jólahreingerningu. Þá er farið inn í hvert horn og skúmaskot og þvegið betur en vanalega. Þetta auðveldar síðan móttöku hins guðlega kærleika sem við vinnum með í shamballa.

Á föstudaginn hitum við svo upp fyrir námskeiðið með kynningarfundi en þar förum við í kærleikshugleiðslu og heilun auk smá fróðleiks. Þangað eru allir velkomnir.