Shamballa helgi

Síðastliðna þrjá daga höfum við notið þeirra forréttinda að deila kærleikshugleiðslum og vinnu með yndislegu fólki. Fyrst var opið hús hér hjá okkur þar sem við fórum saman í hugleiðslu og notuðum svo aðeins hjálpandi hendur í kjölfarið og um helgina fræddum við um shamballa og fórum í fjölmargar hugleiðslur og æfingar sem styrkja sjálfsmyndina og auka tenginguna við kærleiksuppsprettuna.

Á laugardaginn fórum við meðal annars í hugleiðslu sem kallast "spiritualiasation of matter" með Mahatma orkunni og var hún svo kröftug og mikill kærleikur sem hver fruma tók á móti að við skynjuðum nýtt líf í hverri frumu og eins og þær sindruðu allar. Þessi sterki kærleikur er svo allt um vefjandi og umbreytandi og getur grætt öll sár og ójafnvægi sem fyrirfinnst í líkama okkar og sál. Mér datt í hug hvort ég ætti ekki hreinlega að bjóða upp á slíka hóphugleiðslu amk vikulega með þessarri hugleiðslu þar sem blóðið okkar verður hreinn kærleikur og flytur þá jákvæðu orku til allra fruma. Enn betra væri að fara í þessa hugleiðslu daglega og er ég viss um að margir sjúkdómar myndu láta undan og víkja fyrir heilbrigði í slíkri vinnu.

Einnig fórum við í hugleiðslu þar sem Mikael erkiengill hjálpaði til við að klippa á karmísk tengsl og gömul heit.

Við nýttum okkur einnig hina kosmísku geisla til að hreinsa til i orkusviðinu okkar.

Í kvöld munum við svo vinna með hjartastöðina enn frekar en áður í hugleiðslu með hinum helga gral.

kærleikskveðjur og njótið dagsins