Shamballa mdh námskeið á Ísafirði

Það er ekki á hverjum degi sem mér gefst það tækifæri að sitja shamballa námskeið eingöngu sem þiggjandi en ekki sú sem stýrir herlegheitunum.

Dagurinn í gær og þessi helgi er þó undantekning. Björk Ingadóttir heilari, miðill, hbs jafnari með meiru heldur nú fyrsta námskeið sitt í Shamballa.

Það er oft erfitt að byrja á einhverju nýju verkefni og því er það mér heiður að fá að sitja á hliðarlínunni hjá vinkonu okkar nú þegar hún stígur fyrstu sporin í kærleiks kennslunni.

Ég er sannfærð um að þetta sé aðeins upphafið að löngum ferli Bjarkar þar sem hún deilir viskuorðum og kærleika með þeim sem til hennar leita.

Í gær miðlaði hún erkienglinum Mikael í einkar ljúfri hugleiðslu þar sem klippt var á bönd og höft ótta og fleira.

Kærleikurinn sem ég upplifði var svo yfirþyrmandi að tárin runnu niður vanga minn. Það eru ekki tár sorgar heldur gleði og þakklætis.

Orkan var sterk og fann ég það vel í orkusviði mínu og lýsingar Bjarkar á því sem hún skynjaði í kringum okkur bættu enn við þessa yndislegu stund.

Til hamingju Ísland við höfum fengið annan virkan shamballa kennara á Íslandi og fyrir alla jarðarbúa.