Heimsfriður og heilun jarðar og mannkyns á ólgutímum.

Í dag leit ég í geymdar greinar hjá mér á tölvunni og var leidd að meðfylgjandi grein sem einnig birtist í Sedona journal sama ár. Hún á enn jafn vel við í dag þó hægt sé að skipta um einhver nöfn eða lönd.

kv Lilja

Skrifað 30.mars 2003 meðan nýtt Íraksstríð er í algleymingi og friðargöngur og fundir eru haldnir daglega víðsvegar um heim.

Fyrir nokkrum dögum síðan spurði sonur minn mig um álit mitt á stríðinu í Írak. Í framhaldi af því sagði hann svo: Mamma! Maður gengur til þín allur marinn og blár í framan og þú spyrð hann hvað hafi komið fyrir. Hann svarar; “Ég var barinn af friðarsinnum”. Hvar er þá hinn sanni friður og kærleikur?

Af fréttamyndum sem berast okkur stöðugt inn í stofu sjáum við bæði kyrrðarstundir þar sem beðið er fyrir friði, þögul mótmæli gegn valdbeitingu en einnig gríðarlega heift í garð ýmissa ríkja og ráðamanna. Hatur, reiði, örvænting, sársauki brýst út á yfirborðið.

Allar þessar tilfinningar berast beint inn á Kristvitundarnetið sem umlykur veröld okkar (jörðina okkar) og hefur áhrif á mannkyn allt. Jörðin sýgur í sig mikið af þessu eins og hún hefur alltaf gert. Þ.e. hún er einkonar filter fyrir orð okkar hugsanir og gjörðir. Það má kannski líta á þetta eins og líkama okkar. Við borðum og maturinn fer í gegnum meltingarfærin þar sem næringin er tekin upp. Ef við borðum mikið af óhollri og óhreinni fæðu endar með því að líkami okkar verður uppfullur af eiturefnum og þarmar okkar stíflast nánast. Af því leiðir að orkuflæði okkar hægir á sér og sjúkdómar gera vart við sig. Sama gegnir um tilfinningar, kærleikur er hreinsandi og uppbyggjandi en sorg, reiði, hatur ofl. stíflar.

Sama má segja um jörðina. Hún nærist m.a. á orkunni sem kemur frá okkur hvernig sem hún er. Á undanförnum áratugum hafa ljósberar víðs vegar um heim unnið stórkostlegt starf til að hjálpa jörðinni að hreinsa sig af þessu uppsafnaða tilfinningarusli mannanna og orkukerfi hennar hefur styrkst til muna auk þess sem mörg ný orkunet hafa myndast árlega á síðasta áratug. Tíðni jarðar hefur hækkað verulega.

Ólga eins og nú er á jörðinni ásamt eyðileggjandi sprengjum sem tvístra orkunetinu hefur geysileg áhrif á allt líf. Því er mikilvægt að allir ljósberar sem vaknaðir eru til starfa sinna stilli inn á kærleikan, tengi við Uppsprettuna og leyfi kærleikanum að streyma gegnum sig til jarðarinnar í samræmi við hinn æðsta vilja. Það er mikilvægt að dæma ekki og sjá hið góða í öllum einstaklingum og vita að allt er í samræmi við æðra plan. Starf okkar skiptir máli, skiptir reyndar sköpum. Hver lítil bæn, hvert orð, hver hugsun hefur áhrif.

Í morgun var mér sýndur hluti af því starfi sem fer fram í kringum og á jörðinni nú um stundir og hvaða áhrif kærleikur okkar hefur.

Mér fannst ég svífa beint upp af jörðinni, uns ég var stödd í ljósfari sem staðsett var beint yfir Írak. Þetta var risastórt far og fannst mér það vera á stærð við landið sjálft. Á einum skjá mátti sjá mörg smá för sem ferðuðust fram og tilbaka eftir orkulínum sem tvístrast höfðu til að tengja þær saman að nýju og setja einnig upp bráðabirgðanet. Þetta er stöðug vinna þar sem sprengjum rignir niður á landið alla daga.
Margir ljósberar hjálpa til við þennan starfa. Á öðrum skjá mátti sjá tilfinningar og hugsanir mannana þar sem þær stigu upp af jörðinni í bólstrum. Táknrænt var að upp frá arabalöndum steig þétt dökkt ský upp að Kristvitundarnetinu. Þar komu á móti þeim léttir, hvítir og gylltir bólstrar og rétt eins og plús og mínus mætast sameinðust þeir og umbreyttust. Má eiginlega segja að þeir hafi orðið að núlli eða tómi. Hinir léttu bólstrar voru bænir um frið, kærleikshugsanir frá mannkyni og ljósberum um heim allan. Til hjálpar voru einnig herskari engla með Mikael í fararbroddi. Dökku bólstrarnir komu reyndar ekki bara frá arabalöndum heldur frá öllum löndum heims þar sem hatur, reiði, sorg eða aðrar tilfinningar dýrseðlis okkar (lægri hvata eða hinna þriggja neðstu orkustöðva) koma upp og beinast að ákveðnum löndum, einstaklingum eða þjóðum. Þau geta fyllt orkusvið viðkomandi svo að hann eða þjóðin í heild á erfitt með að sjá farsæla lausn og vera í tengslum við Guðsjálf sitt. Því er svo geysilega mikilvægt að horfa ekki á Saddam, Bush, Blair eða aðra leiðtoga sem verkfæri hins illa heldur að sjá hið Guðlega í þeim. Aðeins það mun hjálpa þeim til að tengjast hinu guðlega í sjálfum sér.

Á þriðja skjánum sá ég opnun eða hlið á jörðinni þar sem ljósberar hjálpuðu jörðinni eða Gaiu að losna við spennu auk þess sem Gaia losar um hana með hreyfingu jarðskorpunnar (jarðskjálftum), í gegnum eldgos, jarðskrið, storma osfrv. Þær hreyfingar allar eru þó mun minni vegna þessarra hliða sem ljósberarnir halda opnum.
Þessi hlið voru dreifð um öll ríki jarðarinnar. Einnig losnar um mikla spennu í gegnum allar helstu orkustöðvar jarðarinnar.

Ég spurði nú hvað ég gæti gert til að hjálpa. (ég veit að ég vinn allar nætur upp í skipunum meðan líkaminn sefur). Fyrir tveimur árum eða svo færði Gaia ásamt hjálparliði mínu mér og mannkyni stórkostlega gjöf sem er blanda fjölmargra hrifkjarna sem ég kalla Jarðarheilarann. Þessi blanda hreinsar alla ómstríða orku og umbreytir henni í ljós.
Ég kallaði nú á allt teymið mitt sem samanstendur af fjölmörgum englum, ljósverum, tívum og nátturuöndum auk Gaiu og Guðssjálfs míns og baðaði jörðina í þessum jarðarheilara. Rétt eins og við förum í bað sá ég jörðina fara ofan í “bala” fullan af þessarri umbreytandi orku. Ég bað um að allt væri í samræmi við hinn æðsta vilja eins og ávallt er ég sendi heilun til fólks eða staða.

Því næst sá ég mig sameinast tvíburasál minni í fullkomnum samruna yin og yang á háu plani eða í mjög hárri vídd. Ég var uppfull af kærleika og svo “stór”. Vitundin víkkaði út og var þvílík að mér fannst ég vera jafnstór alheiminum. Ég var alheimurinn og allur kærleikurinn sem ég var, fyllti jörðina þar sem hún var hluti af mér og ég af henni.

Munið að við erum langt frá því að vera ein og mikill fjöldi engla og himneskra vera hjálpa okkur þar sem við höfum óskað eftir því. Höldum áfram að vinna hið stórkostlega starf sem við vinnum dag hvern og bætum frekar í og setjum upp í næsta gír. Þið getið t.d. sent kærleiksorku til einstaklinga og staða sem þið sjáið á sjónvarpsskjánum hjá ykkur eða heyrið í í útvarpinu eða sjáið á tölvuskjánum. Orka ferðast án nokkurra hindrana af efni.

Friðurinn byrjar innra með þér.

Með Mahatma kærleikskveðju, Lilja Petra Ásgeirsdóttir, shamballa meistari.